عندي سؤال.. زجل بقلم فاطمه خلخال

عندي سؤال …..زجل

ها العار غير جاوبوني
على هاذ السؤال ..
راه محيرني وشاغل ليا البال..
علاش قلات العفة .
و كثرات الهدرة
كلشي مكابل
غير القيل و القال ..
ما بقات خوا و لاجورا
و تغيرات الأحوال
ما بقى العم عم
ولا الخال خال ..
و تقطعات الأرحام .
لله ياناس علاش
ولينا في هاذ الحال ..
نسينا كلام ألله
و ياك وصانا
نكونو يد وحدة
و نرعاوا حرمة الجار ..
وااعلاش ولينا في ها الحال .
الضربة تجيك من عند
لقريب ليك
تعوج ليك الظهر …
بلا ما تشعر ….
وتخليك تخمم عايش في الوسواس ..
مال هاذ آلدنيآ تبدلات.
ما بقى عندها ساس
ما بقات محبة ما بقات محنة .
ما بقى لكلام قياس ..
لله ياناس غير جاوبوني
علاش لحيى طار ليه لخيال ..
كلشي غادي موضر بلا عكال .
يا بنادم بارك ما تقطع في لوصال .
آلدنيآ فانيا
و ملك الموت علينا جوال .
ما ينفع معاه لا جاه ولا مال.
دير عقلك راه ما يدوم حال..
و الرجوع لله كلو افضال.
كون علام السربة بالقول و لفعال..

فاطمة خلخال