الحرف التالف… زجل بقلم حسن منير
زجلية
الحرف التالف
على قلمي ضميت وجمعت
صباع الكف
بغيت نكتبني قصيدة
نطلعني زفرة وتنهيدة
شهݣةمن زݣى لكبيدة
ضاع مني راس الخيط
اتلف الحرف
لقيت العقل تجلى توضر
الخاطر تغوبش وتغير
الكلمة تلفات على السطر
من بعد ما كانت مݣادة
شادة الصف
عييت نجمع ونرقع فحروفي
عييت نوزن ونݣاد فكفوفي
تسنيت يتمرو يزهاو قطوفي
عواج خطي فمسيرو تفاوت
مشى اتلف
قصيدتي تقلقت مني غضبات
هجرت دواخلي وݣفات
حلفت عندي لا بقات تبات
عييت نعصر فالقلم اللي من
مدادو نشف
ما كتبت ما هنيت راسي
الحرف والكلمة وسواسي
تافقوا علي طايروا نعاسي
ينغزوني بالليل كينفيق
يطيروا بالخف
حسن منير 15/03/2022