فرتح السعد… زجل بقلم فؤاد البياز القاسمي

زجلية

(فرتح السعد )

لبست لَخْضَر في عَزْ ايّامي.
مْحَرَّفْ الصّْبَرْ عْلى حَدْ النّْظَرْ
لبست لَحْمَرْ والقَلْب الدّامي
نْقَشْتْ لَمْداد بالدَّمْ عَللْصّْخَر
الى شَيّعَتْ الْعَيْن العَيْن نَظْرَه
تَحْلَف الرّْموشْ بَلْبْغو بْلا عْذَرْ
اِلى بْكى طْويرْ الشّوقْ حَسْرَه
مَدْبوحْ عَللْبوحْ مَنْ هادْ الصّْدَرْ
تْجيني السّْجِيّه بْلاسَبَّه
تْلوحْ مْعانيها شَبَّه شَبَّه
تَزْرَعْ مْحَبَّتْها حَبَّة حَبَّه
نْكونْ دْخاخَنْ السُّرْبَه
فَرْتَحْ السَّعْدْ بَكْري وَغابْ
مْضى مَنْ لَعْذاب حثَّى شابْ
فَيْقوني بِالنّْغيزْ وَلَقْريصْ
حثّى جَبَّحْ قَلْبي و ذابْ
ونْت يالحاضْرَة بالخْيال
كُن جيتِني في الشّْعاعْ
كانتْ لْكَلْمَه ضَوْ في السّْما
ونْت يالغايْبة في الرُّوحْ
كَنْتِ بَنْتْ القاعْ والباعْ
فَمك ضْوا لْخاطَر بِبَسْمه
نْكونْ لِكْ باِلحُب سْمِيّه
نْكونْ خْديم لَهْوى بالنيه
طْريفْ الشّوفة بلا سِيّه
الشَاهَد فينا حَيّ وحيّه

فؤاد البياز القاسمي

المحمدية،المغرب.