صرخة.. زجل بقلم حياط رشيد
زجل: (صرخة)
وااابويا وااابويا آش هاد العلة
جمرة النخوة هبات فغمضة عين
توضرت الهيبة والشان فزحام الدل
عزة النفس ساحت وديان بقلة الدين
شداتها السخفة بخطوة بعدما كانت تهد جبل
تخلطت الدعوة ما بين وبين
بين وجه بكبة زغب
ووجه مطلي من الصباغة سطل
تبادلو الادوار اللول تنتف
والثاني نبت
يقلبو على حروف الزين
تقاسمو لعبار شي بصوت مسلف
ولاخر سكت
بالكثرة ما بقا فيهم ما يتغربل
واااا بويا واااابويا طل طلة
راه هربت علينا وصايا اللولين
تقلبو لمعاني داروها بلعاني كلشي تبدل
بيناتنا شحال من سبع فالنظرة زين
والمضمون سنور مبهدل
قلوب كحالت وعقول بعدت على كل رزين
قلال الخير قدام الشر لي علينا يتكسل
وااابويا وااابويا آش هاذ الحصلة
ما بقا عندنا خيار من اثنين
تا لي درناهم جنبنا ناضو يشتو لينا الشمل
طابو تا طابو بدقانهم دوك اليدين
بعدما تمكنو داو الجمل بالحمل
ما كفاتهم شلالات دموع العين
زادو رجعو سومتنا بطاطة برطل
عرضونا سلعة بالملاين مستفين
لي ما قدو واحد عمر الشواري وزاد فالظهر محمل
حياط رشيد
……19/10/2022