فهمني..زجل بقلم رشيد حياط.

زجل…

فهمني

إلى جيتك فسيفة كلمة
فسرني بالمعاجم
ماشي تفسير الحلمة

والى بغيتي تفهمني
لا تقرانيش وقت الظلمة
يمكن تفقد الحس
ويمكن تتخلط النغمة

لتقرانيش قراية النعامة
الراس فالرملة ولگنازة مسلمة
عند بالها معلمة

قراني بالخاطر وعليا ما تتخاطر
ميمكنش نكون فكلامي ديما حاضر
يمكن اليوم طافي وغدا نجمة

وإلى جيتك فصورة قهوة تتگاطر
بلاش السكر
راه لمرورية وقت نودعو عزازنا للمقابر
وبلاش تسكحني فمرة
شربني جغمة جغمة

ماشي أي فم لكلامو عابر
يمكن تكون راكباه الغمة
و ما شي كل ساكت صابر
يمكن وقتها ودانو صمة

رشيد حياط.….24/04/2023